პავლოვა ციტრუსით და ტროპიკული ხილით

• 225 გ კვერცხის ცილა
• 360 გ შაქარი
• 15 გ სიმინდის სახამებელი
• 3 ჩ.კ. თეთრი ძმარი
• 200 გ ასათქვეფი ნაღები
• 100 გ კრემყველი
• 50 გ შაქრის პუდრი
• 1 ჩ.კ. ვანილის ექსტრაქტი სურვილისამებრ
• ½ ქილა ტროპიკული ხილის ჯემი
• 2 ფორთოხალი

პირველ რიგში, კვერცხის ცილა შევათბოთ ოთახის ტემპერატურამდე. შაქარი სასურველია იყოს შედარებით წვრილი გრანულები, ადვილად რომ გაიხსნას თქვეფისას.

ვაცხელებთ ღუმელს 120 გრადუსზე.

ვიწყებთ ცილის თქვეფას მიქსერით, საშუალო სიჩქარეზე. როდესაც მასა აქაფდება, ვყრით შაქარს ეტაპობრივად, თითო სუფრის კოვზით. ცილა უნდა ვთქვიფოთ მანამ, სანამ შაქარი სრულად არ გაიხსნება, სიჩქარის მომატება სასურველი არ არის. თქვეფის დრო დამოკიდებულია შაქრის გრანულების სიდიდეზე. წვრილი გრანულები მალევე გაიხსნება.

როდესაც შაქრის კრისტალები დადნება და მასა პრიალა გახდება, ჩავასხამთ ძმარს და ჩავყრით სახამებელს, კარგად ავთქვეფთ, რომ შეერიოს, კიდევ 5 წუთი ვაგრძელებთ თქვეფას. 

საცხობ ლანგარზე დავაფენთ პერგამენტს და გადავიტანთ მასას, სუფრის კოვზით ან შპატელის დახმარებით მივცემთ სასურველ ფორმას. ღუმელს ჩავუწევთ 100 გრადუსზე და შევდგამთ ლანგარს. ვაცხობთ 90 წუთი.

ცხობის განმავლობაში ღუმელის კარი არ უნდა გაიღოს, ცხობის დასრულების შემდეგ ნამცხვარს ვტოვებთ გამორთულ ღუმელში 3 საათით ან უმჯობესია მთელი ღამით.

სერვირების წინ ავთქვეფთ ნაღებს, კრემყველს და შაქრის პუდრს ერთად, ვიდრე კრემისებრ მასას არ მივიღებთ. კრემს ვანაწილებთ პავლოვას ზედაპირზე ტროპიკულ ჯემთან და ფორთოხლის რბილობთან ერთად.