ბურგერის რეცეპტი

მჟავე კიტრი (2 საათიანი) ინგრედიენტები:

• საპიკულე კიტრი - 250გ

• ნიორი - 4 საშუალო კბილი

• პილპილის მიქსი - 2გ

• მიხაკი - 4 ღერო • შაქარი - 100გ

• ვაშლის 6%-იანი ძმარი - 150გ

• წყალი - 250გ

• მარილი - 5გ ან 1 ჩაის კოვზი

• დაღერღილი წიწაკა (შებოლილი თუ გაქვს, ჩემპიონი ხარ) - რამდენიც შენს გულს გაუხარდება.

მომზადების წესი:

- კიტრი თხელ მონეტებად დავჭრათ;

- ნიორიც ძალიან თხლად დავჭრათ;

- მოვათავსოთ ჭურჭელში ნოირი და კიტრი, მოვაყაროთ ახალი დაფქვილი პილპილი და ჩავყაროთ 4 მიხაკი.

 - ქვაბში ჩავასხათ ძმარი და წყალი, ჩავყაროთ შაქარი და შებოლილი ცხარე წიწაკის ფანტელები. წამოვადუღოთ, გავხსნათ შაქარი კარგად და დავაცადოთ წიწაკას 1-2 წუთი, რომ გემო კარგად გაუჯდეს.

- დავასხათ ძმრიანი სითხე კიტრს, დავუმატოთ მარილი და კარგად მოვურიოთ. დავახუროთ სახურავი და შევინახოთ მაცივარში 2 საათის მანძილზე, ან მანამ, სანამ ბოლომდე არ გაგრილდება. აქვე, თუ კი ნიორი გალურჯდა, არ შეგეშინდეს! ნიორში არსებული გოგირდი მჟავასთან რეაქციაში შედის და იცვლის ფერს, ოღონდ უწყინარად.

კეტჩუპი (მარტივი ვარიანტი)

ინგრედიენტები:

• კანგაცლილი პომიდორის კონსერვი - 500გ

• ტომატ-პასტა - 20გ

• ნიორი - 1 კბილი

• ხახვის ფხვნილი - 1 სუფრის კოვზი

• ნიორის ფქვილი - 1 სუფრის კოვზი

• მიხაკის ღერო(თავის გარეშე) - 8 ცალი

• შაქარი(დემერარა) - 100 გ ან ნახევარი ჭიქა

• მარილი - 5 გრამი ან ერთი ჩაის კოვზი

• ვაშლის ძმარი 6% - 30მლ

• წყალი - 100მლ

• სიმინდის სახამებელი - 5 გრამი ან 2 ჩაის კოვზი გახსნილი 50მლ წყალში

მომზადების წესი:

- ბლენდერში გავაერთგვაროვნოთ კანგაცლილი პომიდვრები, დავუმატოთ ტომატ-პასტა და 1 კბილი ნიორი. დავაბლენდეროთ მანამ, სანამ მოთმინება არ ამოგვეწურება, ეს კი იმას ნიშნავს, რომ მასა რაც უფრო გლუვი იქნება, მით უფრო კარგია.

- ცალკე, ფილთაქვაში გავაერთგვაროვნოთ მიხაკი, ნიორი, ფხვნილი და ხახვის ჩიფსი. (ან გამოიყენეთ უკვე დაფქვილი სუნელები.)

- ქვაბში მოვათავსოთ პომიდვრის მასა, დავუმატოთ სუნელები, შაქარი და მარილი. წამოვადუღოთ მინიმუმ 10 წუთის განმავლობაში.

- წამოდუღების შემდეგ დავამატოთ ძმარი და წყალი. მთავარია ძალიან არ დადუღდეს, ამიტომ აუცილებლად სუსტ ცეცხლზე ვიმუშაოთ.

- დაახლოებით 20 წუთის შემდეგ, დავამატოთ სიმინდის სახამებლიანი წყალი და კიდევ 5 წუთი ვადუღოთ. შემდეგ, გავაგრილოთ. საუკეთესო გემოსთვის, მეორე დღეს გამოყენება ჯობს. ან, შეგიძლიათ მაღაზიაში იყიდოთ კეტჩუპი და ამდენი აღარ გაისარჯოთ, მაგრამ სიმართლეს გეტყვით - გვეწყინება.

მაიონეზი

ინგრედიენტები:

• კვერცხი 0-კატეგორიის (მაქსიმუმ 6-7 დღის) – 1 ცალი

• მდოგვი დიჟონური, საშუალო სიძლიერის - 1 მსუყე ჩაის კოვზი

• ძმარი ვაშლის 6% - 1 სუფრის კოვზი ან 15მლ

• მარილი - 1 გრამი • შაქარი, თეთრი - 2 გრამი

• ზეთი, მზესუმზირის - 250გ

მომზადების წესი:

- პირველ რიგში, გვჯერა, რომ მაიონეზის გაკეთების ინსტრუქცია არ გჭირდებათ. თუმცა არ დავიღლებით საუკეთესო შედეგის მიღწევაში რომ დაგეხმაროთ.

- კვერცხი ჩავტეხოთ ჭურჭელში და დავამატოთ მდოგვი, მარილი, შაქარი და ძმარი. - დავაბლენდეროთ მასა გაერთგვაროვნებამდე და შემდეგ დავიწყოთ ნელ-ნელა ზეთის შეყვანა, რათა მასა მდგრადი გახდეს. სოუსიც მზადაა.

ბურგერის ფეთი და აწყობა ინგრედიენტები:

• საქონლის ხორცი, კისრის ან ბეჭის - 700გ

• საქონლის ქონი, სასურველია მუცლის - 250გ

• ვორსესტშირის სოუსი (‘’ვორჩესტერს’’ რომ ვეძახით:) – 15გ

• მდოგვი დიჟონური, საშუალო - 20გ

• მონომატრიუმის გლუტამატი (აჯინომოტო, MSG და კიდევ სხვა სახელები:) - 5გ

• ზეთი - შესაწვავად 20მლ

• მარილი - თითო ფეთიზე - 1-2გ ინგრედიენტები 1 ჩიზბურგერისთვის

• 1 პური, შუაზე გაჭრილი

• კარაქი, შუაზე გაჭრილი პურის გასახუხად

• მჟავე კიტრი - 6-7 ნაჭერი • მაიონეზი - 1 ჩაის კოვზი

• კეტჩუპი - 1 ჩაის კოვზი

• პომიდორი, ვარდისფერი - ერთი 3-4მმ სისქის ნაჭერი.

• ჩედარი, ყვითელი, დაუძველებელი - ორი 1.5მმ სისქის ნაჭერი

• ხახვი, თეთრი - 1-1.5 მმ სისქეზე დაჭრილი რკალები

• ბეკონი, ღუმელში გამომცხვარი, 180 გრადუსზე გაოქროსფერებამდე.

მომზადების წესი:

- ფარში გავატაროთ, დავამატოთ ვორსესტშირის სოუსი, მდოგვი და გლუტამატი. კარგად მოვზილოთ და დავატყეპოთ რამდენჯერმე, რათა ჰაერის ბუშტუკები მოჯდეს.

- ფარში დავყოთ 8 თანაბარ ბურთად, კვლავ დავატყეპოთ და მაცივარში მოვათავსოთ.

- ტაფა გავაცხელოთ, ბურთები დავდოთ ტაფაზე და გავაბრტყელოთ (ანუ, დავსმეშოთ). შევწვათ ტემპერატურის დავარდნის გარეშე. არ შეგეშინდეთ დაწვის, ოდნავ გაშავება გემოს ხელს შუწყობს, დაახლოებით მწვადის პრინციპით. 1 მხარე რომ დაიბრაწება, გადმოვატრიალოთ, დავადოთ ჩედარი და მეორე მხარეც დავბრაწოთ. ჯამში, შეწვას 5 წუთზე მეტი არ სჭირდება. აწყობა: პური გაჭერით, კარაქში გახუხეთ, ერთ ნახევარზე წაუსვით კეჩუპი, მეორეზე მაიონეზი (ან აურიეთ), ქვედა მხარეს დადეთ ჯერ მჟავე კიტრი, დაადეთ პომიდორი, შემწვარი ფეთი, შემდეგ ხახვი, ბეკონი და პური.