დაღლილობა, სისუსტე, ფერმკრთალი კანი - ამის მიზეზი შესაძლოა, დაბალი ჰემოგლობინი იყოს

ალბათ, ყველას ჰქონია პერიოდი, როცა დილით გაღვიძება უჭირს, ენერგია მთელი დღის განმავლობაში არ ჰყოფნის და მუდმივი დაღლილობა აწუხებს. როგორც წესი, ეს სიმპტომები დღის გადატვირთულ განრიგს ან ძილის ნაკლებობას ბრალდება ხოლმე. თუმცა, შეიძლება, ამის გამომწვევი მიზეზი ადამიანის სისხლში არსებული ჰემოგლობინი იყოს.

ბლოგში ამ ცილის შესახებ ვისაუბრებთ. დეტალურად მოგიყვებით, რა არის ის, რა ხდება მაშინ, როცა სისხლში მისი დონე ეცემა და, რაც მთავარია, რომელი პროდუქტები დაგეხმარებათ იმაში, რომ თავი უკეთ იგრძნოთ.

ჰემოგლობინის დაბალ დონეს, სამედიცინო ენაზე, ანემიას უწოდებენ. ეს მდგომარეობა მარტივად შესამჩნევი სიმპტომებით ვლინდება, თუმცა ხშირად მათ სხვა მიზეზებს მიაწერენ და სათანადო ყურადღებას არ აქცევენ.

ყველაზე ხშირ სიმპტომებს შორისაა მუდმივი დაღლილობა და სისუსტე, რომელიც ხანგრძლივი დასვენების შემდეგაც არ გადის. ასევე აღსანიშნავია თავბრუსხვევა, მცირე ფიზიკური დატვირთვისას ქოშინი, ფერმკრთალი კანი, გაყინული ხელები და ფეხის ტერფები, გახშირებული გულისცემა, მტვრევადი ფრჩხილები და თავის ხშირი ტკივილი.

ნორმალურ მდგომარეობაში, მამაკაცებში ჰემოგლობინი 13.5-18 გ/დლ-ის ფარგლებში მერყეობს, ქალებში ეს მაჩვენებელი 12-15 გ/დლ-ს შეადგენს, ბავშვებში კი 11-16 გ/დლ-ია. თუ მონაცემები ნორმაზე დაბალია, მიზეზების გარკვევა და შესაბამისი ზომების მიღება აუცილებელი ხდება.

ანემიის მიზეზები მრავალფეროვანია, მათ შორისაა რკინის, ვიტამინ B12-ისა და ფოლიუმის მჟავას დეფიციტი, ქრონიკული დაავადებები, ორსულობა, ძვლის ტვინის პრობლემები და სხვა ფაქტორები. თუმცა ყველაზე გავრცელებული მიზეზი სწორედ რკინის ნაკლებობაა, რის გამოც კვების რაციონი განსაკუთრებული ყურადღებით უნდა დაიგეგმოს.

მცენარეული წარმოშობის საკვებიდან რკინის კარგ წყაროებად ისპანახი, ბროკოლი, ოსპი, ლობიო, ნუტი და სოია მიიჩნევა. რკინის მაღალი შემცველობით გამოირჩევა შვრიის ფაფა და სხვადასხვა სახის მარცვლეული. ყავისფერი ბრინჯიც სასარგებლოა, რადგან ერთი ჭიქა დაახლოებით 1 მგ რკინას შეიცავს, რაც საგრძნობლად აღემატება თეთრი ბრინჯის მაჩვენებელს (0.3 მგ).

ცალკე უნდა აღინიშნოს ფოლიუმის მჟავა, რომელიც B ჯგუფის ვიტამინია და ჰემოგლობინის წარმოებაში არსებით როლს ასრულებს. ორგანიზმი მას ჰემის, ანუ ჰემოგლობინის ჟანგბადის მაკავშირებელი ნაწილის სინთეზისთვის იყენებს. მისი დეფიციტის შემთხვევაში სისხლის წითელი უჯრედები ვერ მწიფდება, რაც ანემიის განვითარებას იწვევს. ფოლიუმის მჟავა გვხვდება ისპანახში, ლობიოში, არაქისის კარაქში, მზესუმზირის თესლში, ხილსა და მარცვლეულში.

C ვიტამინი არაჰემურ რკინას ისეთ ფორმად გარდაქმნის, რომელსაც ორგანიზმი გაცილებით უკეთ ითვისებს. მაგალითად, თუ ოსპის ან ლობიოს კერძს ლიმონის წვენი დაემატება, ან რაციონი პომიდვრით, წიწაკითა და ციტრუსებით შეივსება, რკინის შეწოვის მაჩვენებელი საგრძნობლად გაიზრდება. C ვიტამინის საუკეთესო წყაროებს წარმოადგენს ფორთოხალი, გრეიფრუტი, მარწყვი, წიწაკა და მუქი ფოთლოვანი მწვანილი.

ზომიერი ფიზიკური აქტივობა დადებითად მოქმედებს ორგანიზმზე, რადგან მოძრაობა სისხლის წითელი უჯრედების წარმოებას უწყობს ხელს. ამ შემთხვევაშიც ზომიერება გადამწყვეტია, ვინაიდან გადამეტებული დატვირთვისას ორგანიზმს წითელ უჯრედებზე მოთხოვნილება იმდენად ეზრდება, რომ შესაძლოა, საპირისპირო შედეგი დადგეს.

ჯანსაღი სასმელებიც მნიშვნელოვან როლს ასრულებს. ჭარხლის, სტაფილოსა და ბროწეულის წვენები, ასევე ისპანახისა და კივის სმუზი, რკინასთან ერთად C ვიტამინსაც შეიცავს, რაც ორგანიზმისთვის ორმაგ სარგებელს იძლევა.