5 კოქტეილი, რომელთა შექმნის ისტორია ისეთივე გამორჩეულია, როგორც გემო

კოსმოპოლიტენი, მოჰიტო, პინა კოლადა — ეს კოქტეილები ბარების, წვეულებებისა და მზიანი სანაპიროების განუყოფელ ნაწილად იქცა. ამასთან, მათ ხშირად ვხედავთ ფილმებისა თუ სერიალების პერსონაჟების ხელში, სარეკლამო აბრებსა და ჟურნალების ფურცლებზე.

თუმცა, არსებობს კოქტეილების მთელი სამყარო, რომელიც, საქართველოში ნაკლები პოპულარობით სარგებლობს — მათ მდიდარი ისტორია და საინტერესო გემოვნური თვისებები აქვთ. ამჯერად, ასეთი ხუთი გამორჩეული კოქტეილის გაზიარება გადავწყვიტეთ.

კოქტეილი – ეს არის ერთი სიტყვა მრავალი განსხვავებული ვერსიით

საინტერესოა ტერმინის — კოქტეილი — წარმომავლობის საკითხი, რადგან მისი ზუსტი ეტიმოლოგია დღემდე კამათის საგანია. ერთ-ერთი გავრცელებული ვერსიის მიხედვით, სიტყვა მე-19 საუკუნის ამერიკულ ცხენოსნობასთანაა დაკავშირებული. იმ პერიოდში, არასაგვარეულო, ანუ შერეული ჯიშის ცხენებს, რომელთა წარმომავლობა ბოლომდე დადგენილი არ იყო, კუდებს სპეციფიკურად კრეჭდნენ და ზემოთ უმაგრებდნენ. ეს მათ სუფთა სისხლის ცხენებისაგან ვიზუალურად განასხვავებდა და „cocked tail“ (აწეული კუდი) ეწოდებოდა.

სწორედ ამ ვიზუალური თუ შინაარსობრივი ანალოგიით, ტერმინი მოგვიანებით ალკოჰოლურ სასმელებზეც გავრცელდა. „სუფთა“ სპირტისგან, მაგალითად, პირდაპირ ვისკის ან რომისაგან, განსხვავებით, კოქტეილი სხვადასხვა ინგრედიენტის – სპირტის, შაქრის, წყლის, ბიტერის – ნაზავია. ამიტომ, როგორც „cocked tail“ ცხენი არ ითვლებოდა სუფთა ჯიშის წარმომადგენლად, კოქტეილიც არ იყო „სუფთა“ სპირტი.

კოქტეილების კულტურის განვითარებაზე მნიშვნელოვანი გავლენა მე-20 საუკუნის 20-30-იან წლებში ამერიკის შეერთებულ შტატებში მოქმედმა „მშრალმა კანონმა“ იქონია. ალკოჰოლის წარმოებისა და მოხმარების აკრძალვის პირობებში, არალეგალურად დამზადებული სპირტის ხარისხი ხშირად ძალიან დაბალი იყო. ამიტომ, მის უსიამოვნო გემოსა და არომატს ბარმენები სხვადასხვა ინგრედიენტის – წვენების, სიროფებისა და სხვა დანამატების – გამოყენებით ანეიტრალებდნენ. ამ გარემოებამ, თავისებურად, ხელი შეუწყო ახალი და მრავალფეროვანი კოქტეილების შექმნას, რომელთაგან რამდენიმეს ქვემოთ განვიხილავთ.

ოლდ ფეშენი (Old Fashioned)

ოლდ ფეშენი ვისკის ბაზაზე დამზადებული კოქტეილია, რომელსაც ძალიან საინტერესო ისტორია აქვს. მე-19 საუკუნის ამერიკულ ბარებში ვისკისაგან დამზადებული სასმელი ძალიან მკაცრი და კონკრეტული რეცეპტით მზადდებოდა.

ეს იყო ვისკის, შაქრის, წყლისა და არომატული მწარე ნაყენის, ანუ ბიტერის, ნაზავი. დროთა განმავლობაში, ბარმენებმა ახალი ვარიაციების შექმნა დაიწყეს და სასმელში სხვა ინგრედიენტები, მაგალითად, ლიქიორი, დაამატეს.

ამ სიახლეების ფონზე, ზოგიერთ მომხმარებელს კვლავ კლასიკური, პირვანდელი გემო სურდა. სწორედ ამიტომ, ისინი ბარმენებს ძველი მეთოდით („in the old-fashioned way“) დამზადებულ კოქტეილს სთხოვდნენ. ასე დამკვიდრდა მისი დღევანდელი სახელწოდება – „ოლდ ფეშენი“.

ამ კოქტეილის პოპულარობამ და მისდამი ერთგულებამ დროს გაუძლო და, შეიძლება ითქვას, რომ თანამედროვე კულტურაშიც შემორჩა. ამის კარგი მაგალითია ამერიკული ტელესერიალი „Mad Men“, სადაც მთავარი პერსონაჟი, დონ დრეიპერი, ამ ალკოჰოლურ სასმელს ხშირად სვამს.

კოქტეილის მთავარი იდეა მის მინიმალისტურ შემადგენლობაშია. იგი ისეა შექმნილი, რომ ვისკის ბუნებრივი გემო და არომატი მაქსიმალურადაა შენარჩუნებული. რეცეპტში შემავალი შაქარი ვისკის სიმკვეთრეს ოდნავ ამსუბუქებს, ხოლო ბიტერი სასმელს დამატებით არომატს აძლევს.

კოქტეილი "ოლდ ფეშენის" მოსამზადებლად დაგჭირდებათ შემდეგი ინგრედიენტები:

60 მლ ბურბონი ან ჭვავის ვისკი;
1 შაქრის კუბი (ან 5-7 მლ შაქრის სიროფი, მომზადებული 2 წილი შაქრისა და 1 წილი წყლის თანაფარდობით);
2-3 წვეთი ანგოსტურას ბიტერი;
5 მლ წყალი ( იმ შემთხვევაში, თუ შაქრის კუბს იყენებთ);
ფორთოხლის ცედრა.

ინგრედიენტების მომარაგებისთანავე შეუდექით კოქტეილის მომზადებას. ამისათვის დაბალ, სქელძირიან ჭიქაში ჩააგდეთ შაქრის კუბი ან ჩაასხით შაქრის სიროფი. თუ შაქრის კუბს იყენებთ, დააწვეთეთ ბიტერი და დაამატეთ ცოტა წყალი. შემდეგ, შაქრის კუბი მსუბუქად გასრისეთ და გახსენით ჭიქაშივე. ამისთვის სპეციალური ბარის ხელსაწყო, მადლერი, ან ჩვეულებრივი კოვზი გამოიყენეთ. მთავარია, შაქარი კარგად გაიხსნას და ბიტერსა და წყალს შეერიოს. თუ შაქრის სიროფი გამოიყენეთ, ეს ნაბიჯი აღარ არის საჭირო – უბრალოდ, მსუბუქად შეურიეთ სიროფი ბიტერს. ახლა კი დაამატეთ ვისკი და ჭიქა კარგად გაავსეთ დიდი ზომის ყინულის კუბებით.

ბოლოს, სასმელს დაახლოებით 30-40 წამის განმავლობაში ფრთხილად მოურიეთ. ამ დროში სასმელი კარგად გაცივდება და ყინულიც ოდნავ გადნება. სურვილისამებრ, მზა კოქტეილი გააფორმეთ ფორთოხლის ცედრით და/ან კოქტეილის ალუბლით.

საიდქარი (Sidecar)

„საიდქარი“ კონიაკის ბაზაზე დამზადებული ერთ-ერთი ყველაზე ცნობილი კოქტეილია. მისი გამოჩენა მე-20 საუკუნის 20-იან წლებს და ამავე ეპოქის პარიზისა და ლონდონის ბარებს უკავშირდება.

კოქტეილის შექმნის რამდენიმე ვერსია არსებობს. ყველაზე გავრცელებული ისტორიის თანახმად, ის პირველად პარიზის ცნობილ Harry's New York Bar-ში მომზადდა. ამ ვერსიით, კოქტეილი ამერიკელი არმიის კაპიტნისთვის შეიქმნა, რომელიც ბარს ხშირად იმ მოტოციკლით სტუმრობდა, რომელსაც გვერდითი ეტლი – „საიდქარი“ – ჰქონდა მიმაგრებული. ამბობენ, რომ ბარმენმა სწორედ ამ ეტლის პატივსაცემად დაარქვა სასმელს სახელი.

მიუხედავად იმისა, თუ პირველად სად და ვის მიერ შეიქმნა, „საიდქარი“, გემოვნური თვალსაზრისით, ის მალევე აღიარეს იდეალურად დაბალანსებულ სასმელად. კოქტეილში იგრძნობა კონიაკის, ფორთოხლის ლიქიორისა და ახლად გამოწურული ლიმონის წვენის არომატები.

კოქტეილი "საიდქარის" მოსამზადებლად დაგჭირდებათ შემდეგი ინგრედიენტები:

50 მლ კონიაკი (VS ან VSOP კატეგორიის);
20 მლ ფორთოხლის ლიქიორი (Cointreau რეკომენდებულია);
20 მლ ახლად გამოწურული ლიმონის წვენი;
შაქრის კანტი ჭიქისთვის (სურვილისამებრ);
ლიმონის ან ფორთოხლის ცედრა.

კოქტეილის მომზადება ჭიქით გაცივებით დაიწყეთ: კოქტეილის ჭიქის (მარტინის) გაცივებულ პირს წაუსვით ლიმონის ნაჭერი, შემდეგ კი ფრთხილად ამოავლეთ შაქარში. შემდეგ, შეიკერში ჩაასხით კონიაკი, ფორთოხლის ლიქიორი და ახლად გამოწურული ლიმონის წვენი. შეიკერი გაავსეთ ყინულის კუბებით. ენერგიულად ანჯღრიეთ დაახლოებით 15-20 წამის განმავლობაში მანამ, სანამ შეიკერი გარედან კარგად არ გაცივდება. ბოლოს, მომზადებული კოქტეილი სპეციალური ფილტრის (სტრეინერის) გამოყენებით გადაწურეთ კარგად გაცივებულ ჭიქაში.

ფრანგული 75 (French 75)

კოქტეილ „ფრანგული 75“-ის სახელწოდება პირდაპირ და ცალსახად პირველი მსოფლიო ომის პერიოდის ცნობილ ფრანგულ 75 მილიმეტრიან საველე ქვემეხს (Canon de 75 modèle 1897) უკავშირდება. ეს არტილერიული იარაღი იმ დროისთვის სიზუსტითა და სროლის სისწრაფით გამოირჩეოდა, რის გამოც ფრანგულ არმიაში მას მნიშვნელოვანი როლი ჰქონდა.

ითვლება, რომ კოქტეილს ეს სახელი სიძლიერისა და დამათრობელი ეფექტის გამო შეარქვეს, რაც სიმბოლურად ქვემეხის ძლიერ გასროლას მიაგავდა. შესაბამისად, კოქტეილის შექმნის ისტორიაც ამავე პერიოდს და ხშირად სამხედრო მფრინავებს მიეწერებათ.

„ფრანგული 75“ ჯინის, ახლად გამოწურული ლიმონის წვენის, შაქრის სიროფისა და შამპანურის კომბინაციით მზადდება. ეს ინგრედიენტები ერთად გამაგრილებელ, შუშხუნა და ამავდროულად, საკმაოდ ძლიერ კოქტეილს ქმნის.

კოქტეილი "ფრანგული 75-ს" მოსამზადებლად დაგჭირდებათ შემდეგი ინგრედიენტები:

45 მლ ჯინი (სასურველია ლონდონ დრაი ტიპის);
15 მლ ახლად გამოწურული ლიმონის წვენი;
15 მლ შაქრის სიროფი (მომზადებული 1 წილი შაქრისა და 1 წილი წყლის თანაფარდობით);
60-90 მლ მშრალი შამპანური (ან სხვა მაღალი ხარისხის შუშხუნა ღვინო)
ლიმონის ცედრა.

გემრიელი და გამაგრილებელი სასმლის მოსამზადებლად, შეიკერში მოათავსეთ ჯინი, ახლად გამოწურული ლიმონის წვენი და შაქრის სიროფი. დაამატეთ ყინულის კუბები და ენერგიულად შეანჯღრიეთ 15-20 წამის განმავლობაში მანამ, სანამ შეიკერი კარგად არ გაცივდება. მიღებული ნაზავი სტრეინერის (საწურის) გამოყენებით გადაწურეთ მაღალ, შამპანურის ჭიქაში და დაამატეთ კარგად გაცივებული შამპანური. ბოლოს კი მსუბუქად მოურიეთ, რათა ინგრედიენტები კარგად გაზავდეს.

ვესპერი (Vesper Martini)

„ვესპერი“ კოქტეილია, რომლის რეცეპტი და სახელწოდება პირველად მწერალ იან ფლემინგის 1953 წლის რომანში, „კაზინო როიალში“ გამოჩნდა. წიგნის მიხედვით, ცნობილი აგენტი, ჯეიმს ბონდი, თავად უკვეთავს ამ სასმელს ბარმენს და მის მოსამზადებლად საჭირო ზუსტ ინსტრუქციასაც კარნახობს: „სამი წილი ჯინი Gordon's, ერთი წილი არაყი, ნახევარი წილი Kina Lillet. კარგად შეანჯღრიეთ, სანამ ყინულივით ცივი არ გახდება, შემდეგ კი დაამატეთ ლიმონის დიდი, თხელი ნაჭერი“.

ამის შემდეგ, რომანის სიუჟეტის მიხედვით, ბონდი ახლად შექმნილ კოქტეილს ერთ-ერთი პერსონაჟის, ვესპერ ლინდის, პატივსაცემად არქმევს სახელს. ამგვარად, „ვესპერი“ არის კოქტეილი, რომელიც ლიტერატურული ნაწარმოების ფურცლებზე შეიქმნა და შემდგომ რეალურ ცხოვრებაშიც დამკვიდრდა.

„ვესპერი“ კლასიკური მარტინისგან შემადგენლობით განსხვავდება: ის შეიცავს როგორც ჯინს, ასევე არაყს, ხოლო ვერმუტის ნაცვლად Kina Lillet (ფრანგული ღვინო ქინაქინის ქერქის ექსტრაქტით) გამოიყენება. დღეს, ორიგინალი Kina Lillet აღარ იწარმოება. ამიტომ, მის ნაცვლად ხშირად Lillet Blanc-ს იყენებენ, რომელსაც ოდნავ უფრო მსუბუქი გემო აქვს. ზოგიერთი ბარმენი კი Kina Lillet-ის არომატის მისაღებად მშრალ ვერმუტს ან ანგოსტურას ბიტერის რამდენიმე წვეთს იყენებს.

კოქტეილი "ვესპერის" მოსამზადებლად დაგჭირდებათ შემდეგი ინგრედიენტები:

60 მლ ჯინი;
20 მლ არაყი;
10 მლ Lillet Blanc;
ლიმონის ცედრა;

ყველა თხევადი ინგრედიენტი ჩაასხით ყინულით სავსე შეიკერში. ენერგიულად შეანჯღრიეთ, სანამ შეიკერი ძალიან არ გაცივდება. სასმელი გადაწურეთ ორმაგი სტრეინერით (წვრილი ბადით) გაცივებულ კოქტეილის ჭიქაში. ლიმონის ნაჭერი გადაგრიხეთ და ჩაუშვით სითხეში. ბოლოს კი გემრიელად მიირთვით.

ტომის მარგარიტა (Tommy's Margarita)

მარგარიტას კლასიკური რეცეპტი (ტეკილა, ლაიმი, ფორთოხლის ლიქიორი) საყოველთაოდ ცნობილია. თუმცა, დიდი პოპულარობით სარგებლობს მისი ალტერნატიული ვერსია – „ტომის მარგარიტაც“.

ეს კოქტეილი 1990-იანი წლების დასაწყისში სან-ფრანცისკოში, Tommy's Mexican Restaurant-ის მფლობელისა და ბარმენის, ხულიო ბერმეხოს, მიერ შეიქმნა. ბერმეხოს მიზანი იყო შეექმნა მარგარიტას ვერსია, რომელიც ტეკილას გემოს უკეთ წარმოაჩენდა. მან კლასიკურ რეცეპტში ფორთოხლის ლიქიორი (Triple Sec) აგავას სიროფით ჩაანაცვლა.

კოქტეილი "ტომის მარგარიტას" მოსამზადებლად დაგჭირდებათ შემდეგი ინგრედიენტები:

60 მლ 100% აგავას ტეკილა (Blanco რეკომენდებულია);
30 მლ ახლად გამოწურული ლაიმის წვენი;
15 მლ აგავას სიროფი (სასურველია 1 წილი სიროფი;1 წილი წყალი პროპორციით განზავებული, ან მზა);
ლაიმის ნაჭერი.

ტომის მარგარიტას მოსამზადებლად, ყველა ინგრედიენტი მოათავსეთ ყინულით სავსე შეიკერში. კარგად შეანჯღრიეთ დაახლოებით 15 წამის განმავლობაში. სასმელი გადაწურეთ გაცივებულ კოქტეილის ჭიქაში, რომელშიც მანამდე ყინული მოათავსეთ. გააფორმეთ ლაიმის ნაჭრით და მიირთვით.

COPPA Cocktails-ის მზა კოქტეილები ,,ევროპროდუქტისაგან”

სახლში კოქტეილების მომზადება ნამდვილად სასიამოვნო და შემოქმედებითი პროცესია. გვჯერა, რომ საინტერესო წარსულის მქონე და გემოებით სავსე კოქტეილის საკუთარი ხელით შექმნა განსაკუთრებულ თავგადასავალთან ასოცირდება. თუმცა, ხშირად ერთი შეხედვით მარტივი კოქტეილის მოსამზადებლადაც კი არაერთი, ქართული ბაზრისთვის უცხო და ძვირადღირებული ინგრედიენტია საჭირო – სპეციფიკური ლიქიორი, იშვიათი ბიტერი თუ განსხვავებული ტიპის სპირტი. ამას ემატება დრო და ძალისხმევა, რომელიც ინგრედიენტების მოძიებასა და ზუსტი პროპორციების დაცვას სჭირდება.

სწორედ ამიტომ, თუ გსურთ, დაზოგოთ დრო, თავიდან აირიდოთ რთული ინგრედიენტების ძებნა და ამავდროულად, მიიღოთ მაღალი ხარისხის, გემრიელი კოქტეილი, „ევროპროდუქტი“ საინტერესო ალტერნატივას, ნიდერლანდური ბრენდის, COPPA Cocktails-ის მზა კოქტეილებს, გთავაზობთ

COPPA Cocktails-ის მიზანია, ადამიანებს განსაკუთრებული მომენტების აღნიშვნა გაუმარტივოს. ეს პრემიუმ ხარისხის, მზა კოქტეილები პროფესიონალი ბარმენების მიერ შემუშავებული რეცეპტებით მზადდება და ისეთ პოპულარულ და კლასიკურ კოქტეილებს აერთიანებს, როგორიცაა მოჰიტო, პინა კოლადა, კოსმოპოლიტენი, მარტინი, ესპრესო მარტინი, ლონგ აილენდ და ვისკი საუერიც კი.

დაგჭირდებათ მხოლოდ ჭიქა, ყინული და COPPA-ს ბოთლი – გახსენით, ჩამოასხით და იგრძენით ის გემო სახლში, რომელსაც აქამდე მხოლოდ ბარში ეძებდით.